Мулоқоти бонувони  Анҷумани «Занони  яхшинос»-и Маркази омӯзиши пиряхҳои АМИТ бо намояндаи «Академияи илмҳои гуманитарии Бавария»-и Мюнхени Олмон Астрид Ламбрехт

17-уми июн дар толори маҷлисгоҳи Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон” дар  доираи фаъолияти Ассотсиатсияи “Занони яхшинос” мулоқот бо намояндаи «Академияи илмҳои гуманитарии Бавария»-и Мюнхени Олмон Астрид Ламбрехт доир гардид.

Ҳадаф аз баргузории чорабинӣ амалигардонии барномаи «Стратегияи миллии фаъолгардонии нақши занон дар Ҷумҳурии Тоҷикистон» буда,  аз ҷониби Анҷумани «Занони яхшинос»-и Муассисаи давлатии илмии «Маркази омӯзиши пиряхҳои АМИТ» доир ба ҷалби занон ба омӯзиши пиряхҳо, сайқал  додани дониш ва маҳорати занон барои пешбурди тадқиқотӣ илмӣ-бунёдӣ, инчунин муайян намудани роҳҳои нави инноватсионӣ дар масоили омӯзиш ва тадқиқоти пиряхҳо пайваста чорабиниҳои гуногун  гузаронда мешаванд.

Зимни мулоқот олим ва глятсиологи олмонӣ Астрид Ламбрехт аз таҷриба ва донишу маҳорати  худ дар пешбурди кори илмӣ мухтасар  сухан ронда, қайд кард, ки тайи 15 соли охир ба таҳқиқи пиряхҳои Осиёи Марказӣ машғул аст. Мавсуф қайд намуд, ки омӯзиш ва таҳқиқи пиряхҳои Осиёи Марказӣ, бахусус пиряхҳои Тоҷикистон барои боз ҳам вусъат додани кори илмиаш мусоидат хоҳанд кард.

Чорабинии мазкур барои  аз худ намудани малакаву донишҳои нави зарурӣ ҷиҳати омӯзиши пиряхҳо ҳамаҷиҳата кӯмак намуда, инчунин ба якчанд масъалаҳои муҳимми омӯзиши пиряхҳо аз ҷониби занон заминаи хуб хоҳад гузошт.

Мулоқот бо олим-глятсиологи олмонӣ Астрид Ламбрехт хеле хотирмон баргузор гардид.

Ҳамин тариқ, маъмурияти Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон тасмим гирифтааст, ки гузарондани ин гуна мулоқотҳои судмандро бо шарикони рушд ва олимони хориҷи кишвар дар оянда боз ҳам бештар вусъат бахшад.