Санаи 07 майи соли 2026 дар толори маҷлисгоҳи Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон” чорабинӣ бахшида ба Рӯзи Ғалаба ва маҳфили Шоҳномахонӣ баргузор гардид.
Чорабиниро муовини директори Марказ Саидзода Вайсиддин ифтитоҳ бахшида, ҳозирин ва меҳмононро ба муносибати Рӯзи Ғалаба ва баргузории маҳфили Шоҳномахонӣ хайрамақдам намуд. Дар чорабинӣ инчунин муовини раиси Кумитаи иҷроияи ибтидоии “Хирадмандон”-и Академияи миллии илмҳои Тоҷикистон Курбонова Ширин иштирок ва суханронӣ намуданд.
Зимни чорабинӣ оид ба аҳамияти таърихии Рӯзи Ғалаба, ҷасорату матонати иштирокчиёни Ҷанги Бузурги Ватанӣ ва саҳми арзандаи фарзандони Тоҷикистон дар таъмини сулҳу озодӣ ибрози назар карда шуд. Таъкид гардид, ки гиромидошти хотираи қаҳрамонон, арҷгузорӣ ба сулҳу субот ва тарбияи ҳисси ватандӯстӣ аз вазифаҳои муҳими ҷомеаи имрӯза ба ҳисоб меравад.
Ҳамзамон, бахшида ба маҳфили Шоҳномахонӣ аз ҷониби кормандони Марказ порчаҳо аз «Шоҳнома»-и Абулқосим Фирдавсӣ қироат гардида, оид ба аҳамияти ин асари ҷовидонӣ дар тарбияи худшиносии миллӣ, эҳсоси ватандӯстӣ ва ҳифзи арзишҳои фарҳангии миллат ибрози андеша карда шуд.
Дар фарҷоми чорабинӣ зикр гардид, ки баргузории чунин маҳфилҳои маърифатӣ дар таҳкими эҳсоси ватандӯстӣ, эҳтиром ба таъриху фарҳанги миллӣ ва баланд бардоштани маърифати ҷомеа нақши муҳим доранд.
