Дар доираи амалишавии барномаи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф (2020–2040)», «Барномаи давлатии тайёр кардани кадрҳои сатҳи баланди илмӣ барои солҳои 2021–2030» ва ба ифтихори 35-солагии Истиқлолияти давлатии Ҷумҳурии Тоҷикистон, санаи 6 майи соли 2026 тибқи нақшаи баргузории семинарҳои илмӣ дар Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон” семинари илмӣ-назариявӣ дар мавзуи «Равандҳои хатарноки экзогенӣ-геологӣ: ярч, сел ва обхезиҳо» баргузор гардид. Дар семинар Саидзода Суҳбатулло Мирзо номзади илмҳои геологӣ-минерологӣ бо маърӯзаи илмӣ баромад намуда, оид ба хусусиятҳои пайдоиш ва рушди равандҳои хатарноки табиӣ, аз ҷумла ярч, сел ва обхезиҳо дар шароити Ҷумҳурии Тоҷикистон маълумоти муфассал пешниҳод намуд. Зимни маърӯза таъсири тағйирёбии иқлим, омилҳои табиӣ ва антропогенӣ ба фаъолшавии равандҳои экзогенӣ-геологӣ шарҳ дода шуда, масъалаҳои вобаста ба мониторинг, арзёбии хавф ва роҳҳои коҳиш додани хатари офатҳои табиӣ мавриди баррасӣ қарор гирифтанд. Иштирокчиёни семинар доир ба аҳаммияти таҳқиқоти илмӣ дар самти омӯзиши равандҳои геологӣ ва таҳкими чораҳои пешгирикунандаи офатҳои табиӣ мубодилаи афкор намуданд.
