Санаи 15.10.2026 дар Муассисаи давлатии «Институти омӯзиши пиряхҳо ва криосфераи Академияи миллии илмҳои Тоҷикистон» ҷаласаи Иттифоқи касабаи олимону кормандони Институт баргузор гардид, ки дар он фаъолияти кормандон дар самти ташкил ва баргузории чорабиниҳои илмӣ, фарҳангӣ ва ҷамъиятӣ бахшида ба 35-солагии Истиқлоли давлатии Ҷумҳурии Тоҷикистон мавриди баррасӣ қарор гирифт.
Дар ҷараёни ҷаласа таъкид гардид, ки Истиқлоли давлатӣ бузургтарин дастоварди таърихии миллати тоҷик буда, барои рушди устувори соҳаҳои гуногуни ҳаёти ҷомеа, аз ҷумла илму маориф, заминаҳои мусоид фароҳам овардааст. Дар даврони соҳибистиқлолӣ бо дастгирӣ ва таваҷҷуҳи пайвастаи Ҳукумати Ҷумҳурии Тоҷикистон ба рушди илм, махсусан таҳқиқоти марбут ба пиряхҳо, захираҳои обӣ ва равандҳои криосферӣ, аҳаммияти махсус дода мешавад.
Зикр карда шуд, ки кормандони Институти омӯзиши пиряхҳо ва криосфераи АМИТ дар баробари иҷрои вазифаҳои илмӣ-таҳқиқотии худ дар ташкил ва баргузории чорабиниҳои илмӣ, фарҳангӣ ва ҷамъиятӣ бахшида ба 35-солагии Истиқлоли давлатии Ҷумҳурии Тоҷикистон иштироки фаъолона намуда, дар сатҳи баланд доир гардидани онҳо саҳми назаррас гузоштанд.
Аз ҷумла, иштироки фаъолонаи кормандон дар роҳпаймоиҳои идона, корҳои ташкилию омодагӣ, инчунин қабул ва гусели меҳмонони хориҷӣ ҳамчун намунаи масъулиятшиносӣ, ҳамбастагии меҳнатӣ ва эҳтиром ба арзишҳои миллӣ арзёбӣ гардид.
Дар ҷаласа ҳамчунин таъкид шуд, ки иштироки фаъолонаи кормандон дар чорабиниҳои муҳими давлатӣ ва ҷамъиятӣ на танҳо ифодагари ҳисси баланди ватандӯстӣ ва масъулияти шаҳрвандӣ мебошад, балки барои баланд бардоштани нуфузу эътибори муассиса, таҳкими ҳамкориҳои илмӣ ва муаррифии дастовардҳои илми тоҷик низ мусоидат менамояд.
Дар идомаи ҷаласа ба масъалаҳои таҳкими интизоми меҳнатӣ, баланд бардоштани ҳисси масъулиятшиносӣ, рушди ҳамкориҳои дастаҷамъона ва ҷалби бештари кормандон ба чорабиниҳои илмӣ ва ҷамъиятӣ таваҷҷуҳ зоҳир карда шуд.
Дар фарҷоми ҷаласа як қатор олимону кормандони Институти омӯзиши пиряхҳо ва криосфераи Академияи миллии илмҳои Тоҷикистон барои иштироки фаъолона дар чорабиниҳои бахшида ба 35-солагии Истиқлоли давлатии Ҷумҳурии Тоҷикистон, саҳми арзанда дар корҳои ташкилӣ, масъулиятшиносӣ ва фаъолияти пурсамари ҷамъиятӣ бо ифтихорнома ва сипоснома сарфароз гардонида шуданд.
