17 марти соли 2026 дар маҷлисгоҳи Маркази омӯзиши пиряхҳои Академияи миллии илмҳои Тоҷикистон Конференсияи илмӣ–назариявӣ бахшида ба Рӯзи байналмилалии ҳифзи пиряхҳо ва ҷашни байналмилалии Наврӯз бо иштироки намояндагони мақомоти марбута баргузор гардид.
Конференсияро директори Марказ, номзади илмҳои геология ва минералогия Шерализода Н. Ш. ифтитоҳ намуда, дар суханронии худ ба аҳамияти таърихию фарҳангии ҷашни Наврӯз, нақши он дар эҳёи табиат ва таҳкими арзишҳои миллӣ, таърихи ҷаҳонӣ гардидани ин ҷашни бостонӣ, инчунин ба ташаббусҳои сатҳи байналмилалии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ҳифзи пиряхҳо ва масъалаҳои глобалии обу иқлим таваҷҷуҳи махсус зоҳир намуд.
Дар ҷараёни конференсия кормандони илмии Марказ бо маърӯзаҳои илмӣ баромад карданд. Аз ҷумла, Давлатова М., доктори PhD, дар мавзӯи «Наврӯз – ҷашни эҳёи табиат» ва Боқизода А., ходими илмии шуъбаи гидрометеорология ва тағйирёбии иқлим, дар мавзӯи «Масъалаҳои экологӣ ва ҳолати имрӯзаи пиряхҳои ҳавзаи дарёи Зарафшон» маърӯза пешниҳод намуданд.
Иштирокчиёни конференсия ба ташаббусҳои байналмилалии Президенти Ҷумҳурии Тоҷикистон муҳтарам Эмомалӣ Раҳмон дар самти об, ҳифзи пиряхҳо ва тағйирёбии иқлим баҳои баланд дода, таъкид намуданд, ки ин иқдомҳо мавқеи Ҷумҳурии Тоҷикистонро дар арсаи ҷаҳонӣ таҳким бахшида, барои ҳалли масъалаҳои мубрами сайёра, аз ҷумла таъмини амнияти обӣ ва ҳифзи муҳити зист, заминаи устувор фароҳам меоранд.
Дар фарҷоми чорабинӣ, тибқи анъанаҳои неки Наврӯзӣ, байни ходимони илмӣ ва унвонҷӯён маҳфили байтбарак баргузор гардид, ки фазои идонаро боз ҳам ғанӣ гардонид.
